Nijs

Oanrekommandaasjes P.C. Hooft-priis 2025 Proaza

P.C. Hooft-priis foar Durk van der Ploeg of Hylke Speerstra?

It Skriuwersbûn docht in oanrekommandaasje oan de sjuery fan de P.C. Hooft-priis foar proaza 2025. De skriuwers dêr’t it om giet, binne Durk van der Ploeg en Hylke Speerstra. De oanrekommandaasje is op de reachside te finen.

De P.C. Hooft-priis is in oeuvrepriis dy’t neffens it reglemint fan de P.C.  Hooft-stifting takend wurde kin oan in Nederlânsktalich auteur of in benammen yn it Frysk publisearjende skriuwer. Yn de 75 jier dat de priis bestiet, is der lykwols noch nea in haadsaaklik Frysktalige skriuwster of skriuwer beleanne. Unbekendheid mei de Fryske literatuer by de sjuerys spilet neffens it Bûn dêr sûnder mis in grutte rol by. De Fryske skriuwerij docht foar oare literatueren net ûnder. It Bûn hat dêrom op him naam de P.C. Hooft-stifting en de troch har beneamde sjuery fan goede ynformaasje te foarsjen.

De oanrekommandaasje is, nei oerlis mei it bestjoer fan it Bûn, skreaun troch Martsje de Jong fan Bitgum. It bestjoer is ferantwurdlik foar de seleksje fan de auteurs.

.

Read More

Twatalige bondel fan Jan Hendrik Woudstra – Levensadem

Jan Hendrik Woudstra presintearre ôfrûne moanne yn It Geboutsje yn Drachtster Kompenije syn sechsde dichtbondel: ‘Levensadem’. Woudstra lies op dizze middei foar út syn nijste bondel. Njonken gedichten is in ‘Levensadem’ ek in famyljeferhaal opnaam. Dit jier is it hûndert jier lyn dat Jan Modderman fermoarde waard. It ferhaal giet dat hy de oerpake wie fan Jan Hendrik. Wilens it skriuwen fan dit famyljeferhaal wiene der ûntjouwingen dy’t nei hûndert jier antwurd joegen.

‘Levensadem’ is al te keap by útjouwerij De Pinne of by Woudstra sels fia inGedichten7@gmail.com (ISBN 9789403733319).

Read More

Rink van der Veldepriis foar Gerard Marcel de Jong

De Rink van der Veldepriis 2024 giet nei Gerard Marcel de Jong foar syn boek Blau fan dagen, griis fan ônrust. It is in romandebút, en tagelyk de earste (by in útjouwer útbrochte) roman yn de Biltske taal. It boek is neffens de sjuery, besteande út Ans Wallinga, Ammerins Moss-de Boer en Douwe de Bildt, ‘in benearjend en louterjend boek dat de lêzer neitinke lit oer identiteit, it plak dêr’t je opgroeie en it dilemma fan bliuwe of loslitte en fuortgean.’

De Rink van der Veldepriis is in twajierlikse priis fan de gemeente Smellingerlân en de Stifting FLMD. De priis –  in byld fan Anne Woudwijk en in jildbedrach fan € 2000 – wurdt op 22 juny útrikt yn It Polderhûs op de Feanhoop. 

Lokwinske Gerard!

Read More

Nijjiersgedicht Arjan Hut

By ús Nijjiersgearkomste lies Arjan Hut twa moaie gedichten foar. Ien dêrfan, ‘Draaimûnen’, diele wy ek graach hjir mei jim!

Draaimûnen
de takomst liket in frjemde streek, in lân
krekt achter it each
en yn dat lân prate se in frjemde taal

mei klanken en yntonaasjes
dy’tsto nea alhiel ferstiest

mar se reitsje dy! de wurden, al lykje se net
foar dy bedoelt, se reitsje dy

as de muzyk fan rein op it smoarge finster of
it fluitsjen fan de stoarm dy’t grut fan see komt

en skielk, as eksoatyske symfony
oer de dakpannen strykt

en ûnder de dakpannen rommelet
dêrsto, draaimûnen tusken de earen, dronken
foar de sliep, de nacht noch wiet,
dysels deljoust

en alle nije lûden binne as poëzy en waaie mei dy mei

do, nei siken happend
te dreamen foar de dagen út

Read More

Jacobus Quirijn Smink 31-1-1954 – 27-1-2024

Krekt foar syn santichste jierdei moatte wy ôfskie nimme fan in bysûnder lid fan It Bûn. In dichter dy’t yn syn wurk romte joech oan alle fasetten fan it libben, ljocht en tsjuster, fertriet en bliedskip, leafde en sykte. Mei syn bondel ‘Sondelfal’ wûn er mei rjocht de Gysbert Japicxpriis. Ek as redaksjelid fan Hjir en Ensafh. en as oersetter fan wrâldliteratuer hat er de Fryske literêre wrâld kleur jûn.
Sûnt er wer werom ferhúze nei Sondel sloech er gjin gearkomste fan it Bûn oer; ek op it Skriuwerswykein wie er der koart by en begjin dit jier hawwe we tegearre noch proaste op in moai jier. Wy sille him misse.

De útfeart is freed 2 febrewaris yn Sondel, mar ek online (De Haven, Sondel) te folgjen.

Ut Sondelfal (2009):

Spilest hieltyd itselde deuntsje
Op ‘e lier sikerwier
Biddeste mar wat ta dyn God

Gun har it feest fan de ûnderwrâld
Wat ferlern giet
Yn in omsjoch
Sjoch der net nei om

In prachtich In Memoriam is ek te lêzen op de reachside fan De Moanne. In biografy oer it libben fan Jacobus sil yn 2024 ferskine.

Read More

Arjan Hut nije Dichter fan Fryslân

De advyskommisje fan Dichter fan Fryslân bestie dit jier út Sigrid Kingma, ôfswaaiend DfF, Céline Wierda fan Explore the North en ús bestjoerslid Ammerins Moss-de Boer. Tegearre keazen sy foar Arjan Hut as nije Dichter fan Fryslân.

Arjan Hut oer syn beneaming ta Dichter fan Fryslân: “It soe moai wêze as ik yn dizze tiid fan orakels, tsjutters en antwurden in tsjinwicht biede kin, en in romte fertsjinwurdigje dêr’t plak is foar twifel. In slagge gedicht sit op sa’n wize ynmekoar dat elkenien der krekt wat oars yn sjocht. Der is net ién wierheid, ién korrekte betsjutting of ién ynterpretaasje. En fierder: minder wifi, mear poetry!”

Read More

De Wûndere Leafde fan Emine en Einte – Willem Verf

Oankommende tongersdei, 9 novimber, fertelt Willem Verf oer it ta stân kommen fan syn ‘tendinsroman’  De Wûndere Leafde fan Emine en Einte. Tet Rozendal draacht lietteksten foar dy’t yn de roman in wichtich plak ynnimme. Jaap Louwes sjongt in seleksje út syn eigen repertoire.

‘De wûndere leafde fan Emine en Einte’ is Willem Verf syn achtste boek. Syn boeken binne skreaun op ‘de hûd fan de tiid’, mei in grutte belutsenheid by gewoane en tagelyk bysûndere minsken, dy’t har steande hâlde moatte yn de om harren hinne twirjende maatskippij. Hy debutearre tige suksesfol yn de jierren tachtich, wie yn de jierren njoggentich en nul (njonken syn wurk as direkteur fan wolwêzen-ynstellings) aktyf yn Provinsjale Steaten foar GrienLinks. Doe ’t er út de Steaten wie begoan er wer te skriuwen. ‘De wûndere leafde’ is in ferfolch op ‘Bûtenman en Bûtenfrou’, mar it boek lit him ek goed lêze foar wa’t de foargonger net ken.

It programma begjint 20 oere, seal iepen 19.30. Tagong oan de seal € 8, leden d’Bieb (fia d’Bieb) € 5, leden it Nut fergees (fia ’t Nut).

Read More

Noardewyn

Dit is foar elkenien in ‘must’ om te sjen! “Noardewyn” mei en oer Durk van der Ploeg!

https://www.youtube.com/watch?v=sFCJzFsvqvc
Read More

Definitive programma Skriuwerswykein 4-5 novimber 2023

Der hat in lytse oanpassing plak fûn yn it programma. De ynlieding fan Janneke Spoelstra oer Fryske dichteressen is net op sneintemoarn, mar op sneontejûn. Miskien is dat foar guon oanlieding om har noch oan te melden. Mar ek guon dy’t gewoan  by neier ynsjen dochs komme wolle: oanmelde kin oantemei tiisdei 31 oktober fia 06-46134700!

Sneon:
Fan 10 oere ôf wolkom: Kofje, tee, koeke
11 oere: Erik Betten hâldt in ynlieding oer wat in thriller is en wat der te sjen komt by it skriuwen fan in spannend boek
12.30 oere: lunsj
13.30 oere: workshop û.l.f. Erik: hoe skriuw ik sels in spannend ferhaal of gedicht
15 oere: skoft
15.30 oere: Anita Terpstra: wêrom skriuwt hja thrillers, wat is der moai oan it sjenre, wat komt der by te sjen?
17 oere: aperityf
18 oere: Skriuwersmiel
20 oere: Janneke Spoelstra oer de ynterview bondel mei Fryske dichteressen dêr’t hja oan wurket, en mei spesjaal omtinken foar it wurk fan Baukje Wytsma (ferstoarn 29-12-2022, net ynterviewd foar dizze bondel) en Aggie van der Meer (ferstoarn 12-08-2023, al ynterviewd foar dizze bondel).
21.30 : neisit
(It ûnderdiel “Bûnte Jûn” ferfalt. Mar leden dy’t al wat taret hienen of wat aardichs yn ‘t sin hawwe, krije fansels de gelegenheid dat te presintearjen!)

Snein:
7.30 oere: moarnskuier mei Jan Hendrik
9.00 – 10.30: moarnsbrochje, evaluaasje
Om 11 oere hinne: wer op hûs oan!

Read More
1 2 3 4 5 7 8 9 10
Facebooktwittermail